Chrome brauzerinə süni zəka əsaslı yeni təhlükəsizlik funksiyası əlavə edilib
Google Chrome brauzerinin tərtibatçı komandası brauzerə real zaman rejimində zərərli saytlar, yükləmələr və genişlənmələrdən (extensions) qorunmaq üçün süni zəka əsaslı "Enhanced Protection" (Gücləndirilmiş Mühafizə) funksiyasını inteqrasiya edib. Bu funksiya Safe Browsing sisteminin bir hissəsidir və 3 aylıq Canary test mərhələsindən sonra Chrome-un bütün platformalardakı versiyalarında əlçatan olub. Lakin bu funksiyadan aktiv istifadə zamanı ziyarət edilən saytlarla bağlı məlumatlar Google-a ötürülür.
Əvvəllər bu funksiya "Proactive Protection" adlanırdı, lakin yeni adlandırma süni zəkanın brauzerin təhlükəsizlik sisteminə inteqrasiyasını vurğulayır. Hazırda süni zəka ilə inteqrasiya edilmiş yeni funksiyanın əvvəlki süni zəkasız versiyadan nə ilə fərqləndiyi tam aydın deyil. Buna baxmayaraq, Google-un machine learning alqoritmlərindən istifadə edərək real vaxt rejimində istifadəçi davranış modellərini analiz etməsi və beləliklə, əvvəlcədən qeydə alınmamış potensial təhlükəli saytlar barədə xəbərdarlıq etməsi ehtimal olunur.
Google-un bəyanatına görə, süni zəka ilə təchiz edilmiş təhlükəsizlik sistemi yüklənən faylları daha dərindən skan edir. Bu, şübhəli yükləmələri vaxtında aşkar etməyə və brauzerin təhlükəsizlik sisteminin dəqiqliyini və effektivliyini artırmağa imkan verir. Süni zəka əsaslı gücləndirilmiş mühafizə funksiyası standart olaraq deaktivdir, lakin istifadəçilər onu növbəti addımlarla aktivləşdirə bilərlər: "Settings → Privacy and security → Security" bölməsinə keçid edərək Google Chrome-un Windows, Android və iOS versiyalarında bu funksiyanı aktivləşdirmək mümkündür.
